賣賣bb 30 weeks!

Yeah!終於到左囡囡30weeks既時候啦
仲有10weeks就出世啦!
係呢個時候產檢會越黎越密

不過尋日發夢個囡出世,真係嚇死我

點都好,仲有兩個月都無,我就放產假啦!
oh!10 weeks paid ML I'm coming!!!!!!!!!!!!!!!!!!

賣賣bb 29 weeks!

今日約左4週一次去私家做產檢既時候
去左都好順利,留埋小便
之後等左一陣就入得去見醫生

賣賣BB而家29週,3磅重
頭長度同肚圍都係標準,
佢隻大脾骨根度已經去到30週,
嘩!似足爸爸就好啦

之後都有問醫生,
因為我近排訓訓下醒左個胃好痛同抽筋
醫生話可能胃酸倒流,唔好食咁飽同少食多餐
抽筋有兩個原因,一個缺鈣一個缺乏運動
而家既人都好少缺鈣,即係缺乏運動
所以醫生叫我每日行30分鐘

睇完醫生就去左護協買少少野,
因為要開始準備定走佬袋既東西,
所以差少少買埋就OK,之前既有朋友友同上雅培講座都送左少少
仲買左賣賣換片片墊(我阿媽話唔駛,不過我奶奶話要,咁我買張算),剪指片器同吸鼻鼻器
返到屋企老公話佢有鼻水,我話用住BB個吸鼻鼻器試下得唔得,佢話好嘔心,我話洗左咪得囉,哈哈哈!

之後IKEA送埋之前買既櫃黎,
好野,個櫃到左,賣賣D珍藏就有位擺啦~~~

賣賣bb 27 weeks

今日放工收到美贊臣寄來的....
唔係禮物,係話懷孕7個月既身體...
中曬!

1. 牙齦出血
真係好厲害,明明我無咁容易蛀牙都中左招,而家次次擦牙都流血,我老公話我太用力擦(雖然我唔否認)不過真係勁左

2.容易抽筋
又係呢排右腳小腿抽完筋到左腳,尋日訓訓下醒左對腳小腿好痛(不過無抽筋)

3.腹部隆起
其實隆起好耐,不過近排老公話又大左,去街一定要戴托腹帶,唔係條腰會好痛又好累

仲有, 以下純粹個人感覺
1.容易疲勞(成日都唔夠訓)
2.容易肚餓(無嘔既感覺,不過食完lunch無耐就會餓...),又大食左
3.面容憔悴
4.身體浮腫
5.容易面紅(因為血液循環太勁)

而且我個囡最近踢我次數多左,又大力左

賣賣大力踢

我個囡應該遺傳左我既天殘腳
最近佢都好大力咁踢我,
仲好鐘意係我食緊野啦,訓緊教既時候大力踢
而家6個幾月我諗都未算最大力
我係度諗,遲d再大d,佢應該踢到我噴飯!

賣賣bb 25 weeks @政府檢查

27 Nov 2013

今日到左政府檢查既日子
係之前我問醫生係咪可以join助產士小組,最後ok左
今次第一次見助產士

8:30準時到達,雖然心諗點解咁早,不過都算啦
點知太早唔係一件好事,因為醫院d人好似未ready咁
去到登記,佢問我老公拎身份證,我都覺得怪(因為早幾次都無)
之後就問我地電話,地址,最後問我做咩無左封轉介信
下,我話我睇左幾次啦喎,舊症黎
佢先如夢初醒,係喎....

搞左一輪,入到去
首先要自己驗小便先,之後自己check血壓,體重
搞店就等叫名

等左都大半個鐘先到我
入到去姑娘自己好興奮
同我講助產士小組係做咩啦,幫邊類型既孕婦啦,
之後同我講你而家23週幾...我..疑惑...問...唔係喎,我而家25週幾啦喎
之後佢話你預產期唔係3月20咩..我話係3月7喎...
佢又如夢初醒咁...唔通我scan唔到個code,等我試多次先下.....
好明顯,佢應該無scan我個code囉..

之後問左幾句,我都覺得身體暫時ok無咩問題
就去聽心跳啦
又係搵左一陣先聽到bb心跳,上次睇葉醫生佢話bb心跳110-160下係正常,
賣賣bb心跳都正常

之後就約埋下次期就搞店啦
搞店之後,我地去左canteen食埋早餐
點知,如果街價同出面一樣,不過出去大家樂食
至少乾淨d,大份d,熱d!

香港動植物公園

老公係前晚同我講話禮拜日同我去動植物公園
其實我有諗過點解要帶我去呢度呢?唔係胎教掛

尋日老公放棄佢最愛既馬仔同我出發(我真係覺得自己比D馬仔更重要)
首先去左PP醫肚先,
又去我地最鐘意既THAI BASIL食lunch
食左好多炸野,soft crab, 炸魷魚,炒飲加燒鱔
樣樣加埋真係超好食!!最後仲食左個banana cake

醫飽個肚同我地個囡之後就行上去香港公園啦
入到去行下,睇下,好多人,不過好舒服
行去上去睇雀鳥,好多爸爸媽媽帶小朋友黎呀真係
之後我同老公越行越上,去到半山
我諗住,係咪已經行完啦,因為上緊山嘛

點知我太耐無黎,原來動植物公園係再係上面
我以為頭先個個已經係啦..去到都4點
上到去原來都好多人,好多FAMILY,鬼佬,香港人,同胞,仲有好多BB車

同老公去左睇動物,好多雀鳥,猴子
大約睇左個多小時就離開

等緊車時突然落大雨,感恩我地行公園無落雨
最後我問返老公點解會帶我去公園行
佢話原來之前我吸塵一陣間已經大脾個條筋個痛,
所以帶我去公園行下做下運動會好d吸下新鮮空氣

多謝老公~~

賣賣bb睇醫生 @ 25 weeks

今日約左去睇私家醫生,
而家都係一個月一次睇私家,
有同事同我講4weeks睇一次太多,佢都係6-8weeks睇一次私家
不過可能我想見下我地個囡囡,所以暫時唔改lu
第一次係緊張d!

今日約左10:30am
去到既時候都好多人
姑娘同我地講前面仲有1-2個人
咁我磅住重,留埋小便就等醫生

到入睇醫生,醫生話我血壓小便都正常
bb而家25weeks 1day
個頭size below average不過係正常(其實我個頭同個身比例都唔成正比所以ok)
肚肚同大睥骨size average
bb 而家重1磅10安士
胎水正常,無鈣化點

照完,醫生話bb成長線同佢週期黎睇係正常發展中
比mininum高少少,醫生話相信佢唔太大隻,
又話其實唔大隻都好,生都無咁辛苦
唔,呢句我好同意
因為我出世都未到6磅,而家都係一樣牛高馬大(5呎5)
咁我就放心啦

睇完應該大概10mins,比埋錢走人
姑娘問我有無book飲糖水,公家醫院有無叫我做
我話無,因為上次睇政府姑娘話我年齡唔算太高,屋企無糖尿病歷所以唔駛做
佢話咁我下一次覆診,睇下醫生advise唔advise我做

最後同左pampers的coupon買左2包nb尿片,平40蚊
而家total $56 2packs!抵!不過而家太多尿片,我唔會再買lu

賣賣bb 25 weeks

賣賣bb到左今個禮拜就25 weeks la
時間過我好快!咁快已經6個月了

而家我個肚開始大得快,
而且賣賣都開始踢我,有時feel到佢踢,又時feel到佢轉身

而家唔想嘔,不過仲有野係唔想食
如魚同雞翼!(可憐我買左咁耐都無食既雞翼係冰箱)
幸好屋企人老爺奶奶都唔迫我食!

然而咩都好想食
完全無戒口,咖啡要飲想飲就飲

不過個肚開始大
訓教時要攬個枕墊住個肚先訓到,老公唔想攬
同埋吸塵個時係咁咦"茂"左一陣對大脾肌肉已經痛左幾日
老公話係因為我唔做運動wor!

不過我發覺,而家開始想做返家務
仲有張開始買野,不過唔知買咩

奶奶買左d包被比我,叫我唔好再買
我而家都唔知有咩要買@@

改名

由於老公姓陳,所以改名都可以好多選擇
我阿媽話改我個名難度好高喎

有一次同老公傾計時,傾到改名
講緊啟迪,不過如X迪或者迪X呀

如是者,我老公開始諗
叫
陳允迪,陳迪允,陳迪菁,陳迪君,陳迪雯,陳雯迪,陳迪姿...............
我就同妹妹講,我講一個名,你鐘意就踢我一下啦(真係好低B)
點知講到陳迪君時,佢好似係咁咦踢左一下
之後再講都無踢

我就同老公講,
唔該再諗下叫咩名,佢唔鐘意你幫佢諗以上既名...

胎動

之前政府同私家醫生都有問過我一次
有無感覺到胎動

每次我答案都係個句
其實胎動係咩感覺咖?我好似未感覺到

終於講下講下,我上星期開始感覺到胎動
我排除左肚餓既感覺外,我估係BB旭啦
之後明顯地越黎越大力,就知道係BB旭啦

感覺係個肚皮彈左一下

最近幾日更加覺得bb好大力呀,彈得幾用力下
老公問bb,妹妹,你係咪想踢女子足球呀?

傻左!

妹妹的禮物-1

 

今日同老爺奶奶飲茶既時候奶奶問我有咩未買
我答左爭包被同想買個睡袋比bb
奶奶話要買比我(之前奶奶已經講話要留返d野比佢買,因為我地一早已經買左好多野)

點知飲完茶,我地離開之後
老爺奶奶去左睇bb野,之後叫返我地轉頭話已經買左d野比bb
真係好多謝老爺奶奶咁錫妹妹
一見到都知好貴(因為之前睇bb野都覺得貴到過份)諗住去花園街買,or bb開倉
真係第時要妹妹錫曬爺爺嫲嫲


幾大的一盒禮物

好多樣物品喎

原來係包被

有一件和尚袍

最後有我最想買既睡袋呀

真係好多謝老爺奶奶呀,奶奶仲話未買完
我同老公講叫奶奶唔好再買啦,夠咖啦
本來老爺仲諗住送架bb車比我地,幸好我地一早買左唔駛老爺破費

妹妹,你真係好幸福

討厭的男人/人

你最唔鐘意邊類人,你係工作上最討厭遇到那種人?!

我以前阿姐好煩人,又大聲,哈哈哈,好似雞汁MAY
不過佢唔會害我,唔會卸膊,有事佢會幫我,又肯教我,係煩左d,不過而家先知佢好
以前我老細更加係好人,年過五十既男人,
不過好gentlemen,成日同我講做人既道理,教我好手勢,雖然有d鹹濕(個人感覺)
所以,係呢度做左兩年幾人工唔多都繼續做,當然我都係無負擔先咁大口氣

之前有同事話我地呢個部門最無人事關係,本來仲笑佢
點知,最後我笑我自己太無知,naive
走左先知你地是最好!
有野大家好爽快做,無問題!有好野一齊分享,話說我係澳門買左買好好味既燒魷魚返黎大家一齊食,一齊大朕味,自此之後,每次有同事去都會叫佢地買!

而家,兩個世界
而家我個阿哥係一個三十出頭既男人
成日係阿姐面前扮聽話,但成日係我面前講佢唔識做,最憎佢成日叫我同佢一齊同阿姐講野,阿姐講野時,佢不停係隔離唔唔唔,係啦,食佢口水尾,又話阿姐岩,成個口水佬同跟尾死
講完,行去我個位講阿姐不是

初時我唔識做問佢野,佢都唔係好識
成日老點完,又比阿姐彈返轉頭要做過

成日話頂唔順佢自己好多野做,要搵過第二份工
同一句說話重覆左好多次,我唔知佢有無真係搵,如果有都無工叫你去見唔該你自己檢討下
成日都話佢唔係度就靠曬你地啦,我頂唔順啦
終於有次忍唔住叫佢咁你快d走啦

近排最討厭係佢成日話我多野做辛苦,會同阿姐講
講條毛,阿姐同我講話好難抽起d野比大家跟佢就話明白既,知道既

最賤係最近計糧,有次我要放假未做曬比佢睇左d先,之後比返我做埋
點知我第二日返公司見到佢改左我d糧,我問返佢唔係咁多個鐘咩
原來佢條粉皮先知佢自己計錯,
我話,咁算啦,好彩改得返,但之前個d你有無幫我改左我唔自咖
佢諗左一陣,話,唔知喎,下個月你自己改返咪得囉
真係好一條仆街!廢過廢拉利!

無計啦,忍多三個幾月我就唔駛再見到佢
同事話鬼叫我貪個十個禮拜產假咩!貪字得個貧,現眼報!

結構性照聲波@QE

29/10/2013

今日約左去QE照結構
首先要去E座登記用拎收據,free
之後就去B座3樓等,約3點,都去到4點半先到我

第一時間就係睇bb頭圍同大腦小腦size係唔係按週期大
之後就睇心臟,分4邊,心耳心室,無明顯心漏,不過姑娘話好細微就睇唔到
再睇肺,胃,兩個腎(我唔識睇)
睇肚圍,大脾骨長度
再數兩隻腳腳指數目,10隻,齊數
再睇手指仔,又係齊數(其實佢都係睇d骨黎數,係咪有其他問題係睇唔到)
最後睇下有無兔唇,
不過想睇既時候妹妹佢用手遮住個樣唔比我地睇,姑娘話佢可能知我地睇緊佢遮住左
最後姑娘用scaner"篤"左一下個肚,妹妹縮手啦,不過佢tump低個頭,好古惑
老公同我都叫妹妹比我地睇下你個樣啦~
最後睇到,無事!

我只係用左十幾分鐘就睇完,之前個個都半個鐘
老公話趕收工喎!
不過,姑娘都好nice,有問有答,正正常常,政府檢查都唔錯

睇完老公話要食下午茶喎,都已經成5點啦
hehe,多謝老公每次產檢都陪我去

老公

識左老公其實唔係好耐
結左婚都唔係好耐
不過好想同老公講,老公,你係我最好既朋友!

老公,你雖然對人地好cool好串,不過對我唔係
老公,你雖然好似係一個唔上心既人,不過,你對你屋企人好好
老公,雖然你唔細心,不過你會同我傾計,比到我心靈上既慰藉

雖然,我成日問你愛唔愛我,成日迫你唱歌tum我(不過你唔肯唱)
但係,我知道你係最錫我既人

我係一個比人反問一野,比人質疑一下就會諗係咪自己做錯既人
尤其係我往往咁樣會內傷,不停諗住
今日,又諗左好耐,仲諗同唔同你講
但一見到你,第一句就忍唔住講左出黎
你既回應亦都係相信我,同我分析
令我內傷既時間停止

老公,多謝你!!!!!!!!!!!!!!!!!!!!!!
如果唔係你係度,我諗我好容易會產前抑鬱...

賣賣bb 21 wks

終於等到見賣賣bb既日子啦
我同老公都好期待,我諗係我好期待
因為我好想知bb咩性別

今次約左葉承楷醫生
第一次見佢,都有d緊張,因為轉左醫生嘛
點知葉醫生好nice,問下我既history之後就去照賣賣bb

一照個時葉醫生話bb好大隻喎
因為一入到佢見到我,佢話我已經21wks個肚都唔係好大
bb好正常,胎水2-8,我係4.5,中間正常,無胎位唔正,bb size都同預產期計吻合

之後葉醫生問我同老公知左bb性別未.,我地話未
佢就話你睇兩隻大脾中間係無野既,即係女仔啦(佢話仲見到陰唇,我唔識睇啦)
葉醫生話80-90%係女仔

我個下...唔,有少少唔知點咁
可能我諗住我大肚成日嘔又唔舒服(好多係仔既媽媽都係咁)我諗住係仔啦
奶奶同老公都估係仔(佢地唔係恨仔,只不過佢地感覺似係仔)
突然你成日諗住似係仔點知係女仔既感覺,oh,估錯左咁
不過我係諗,如果係女仔,我會擔心多少少,驚佢睇時出街有危險,唔知識左個咩人,唔知會唔會比人呃

真的,未出世已經開始擔心
真係每個媽媽都會發生的

不過,有同事話香港女仔地位好平等,容易搵工d,咁我都相信
bb,其實你係男仔女仔daddy mommy都咁鐘意你咁愛你,不過你第時唔好同我爭老公!

知道之後就同左6299講,佢地都okay,我都同我媽咪講左
he,咁大家知買咩野比bb啦,hahahha

不過,我地會改名,改bb做妹妹先
因為唔好話我迷信,賣賣,因為我地諗住佢個名係燒賣
不過驚成日真係係咁買,不停買
所以改叫妹妹先

政府醫院檢查

一路都無寫政府醫院檢查

我自己驗孕有左賣賣bb時大約係7月頭
之後係7月中到QE登記,係QE日間醫療中心
一定要帶醫生介紹信(去普通醫生驗完寫封估證明有左個大約預產期幾時),因為我去卓健驗完無見醫生比返我既係一個test report...其實QE有機會唔收,不過個次好彩佢收左我下次補返
地址證明,老公身份證副本
首先去登記填form,之後就會預約第一次助產士新症

大約8月頭我就第一次去QE見助產士
其實都係問你身體狀況,病歷history,同你老公既病歷做登記
之後有無懷孕等,同埋家族有無糖尿history再根據孕婦年紀睇駛唔駛做血糖test
我個次去佢就一次幫我約埋度頸皮,見醫生同照結構既期
其實覺得政府醫院都好好,而家呢d都有得檢查
個助產士話只要早黎登記,就好多期都book到,有時太遲就book唔到度頸皮or照結構(好快full)
所以一記實有左bb既媽咪都記得早d去政府登記
不過,如果要醫生紙證明今次就唔得啦,因為助產士話今次係無我見醫生,所以無醫生紙得到診紙
最後去左1樓定2樓抽血,手勢唔錯(因為我血管較難搵)

31/8/2013
今日係去QE度頸皮
我係9:00第2個booking
不過賣賣bb一開始用個背面對住個姑娘,我轉左幾次身都唔得
最後要出返去行下再叫我,
幸好再入去時賣賣bb終於肯正面住個姑娘
阿姑娘話佢好un皮成日旭黎旭去
我見到賣賣bb對手仔不得揮動,好得意
不過,唯一係姑娘碌得好大力其實有d痛
同埋政府醫院照聲波畫面好清,幾好
都係得到診紙
最後都要去1樓定2樓抽血

16/10/2013
終於第一次去QE見醫生
首先要帶小便CHECK有無protein同sugar
之後等入nurse station聽返上次驗血報告
姑娘話我d血好靚,度頸皮報告係1:17000
賣賣bb好叻哦!之後大約等半個鐘就會去醫生
醫生會比你聽bb心跳證明佢好健康,
之後問多幾句,講多兩句就同你講byebye
醫生話我下次可以去健康院check up,不過我問係咪可以去助產士睇,最後都有期下次都係去返QE,不過係見助產士
最後第一次去QE個姑娘有講,如果bb無咩問題會叫你去健康院,不過你可以問醫生有無得join助產士,
分別係助產士會跟進你個case,如果情況同時間配何到到時有機會係生產過程會係跟你個case既助產士做
不過,如果你公司一定要有醫生紙先claim到病假,咁我建議去健康院,因為去返助產士睇即係得到診紙

因為我公司收到診紙okay所以先咁決定

賣賣bb物品準備

hehe...其實係我有左賣賣兩個月,我已經四出買bb物品
尤其係有舊同事一早送我一d bb冬天既兩用睡袋,厚身既bb衫同好多襪仔

直到8月bb展,聽講係最大型,所以我個日同老公媽咪一齊去
買左張bb床仔 61x110cm(連床褥,4件床上用品) $1890 +$68浴盤
medala swing $1580送濕巾
bb開倉3件長和尚袍,2件厚身和尚袍,3張尿墊,1張包被,20條紗巾
詩思樂棉10幾包(大)+2包(細),1 pack濕巾(for bb抹面口腔,同清洗乳頭,出街用),洗衣液 3包同洗奶樽液3包, total $600 around
huggies 福袋 $100, 兩包初生0碼,一包初生1碼,濕巾一盒,孕婦衛生巾一包(不過政府醫院好似要求扣裝)
nuk 3個一pack 8oz奶瓶 $140,2個5oz奶瓶 $50each,全部黃咀,奶樽擦 $20,夾 $15,送洗衣液一細枝
最好帶定多d cash,因為我除左買medala swing有得碌咭其他都無

之後我係gap買左4個bb連身夾衣,大約$70 each,不過我係官網買,即係上海要經順豐速遞
不過送錯左一件變左襪仔,如果要return好麻煩

仲有好多謝老公同事送左d媽媽入院用既野比我
肚紋油,洗頭泡沫,搽腳loction,三角枕,床墊同奶墊

不過到而家就快5個月,我都開始諗我仲駛唔駛買
因為我問媽咪佢話好多野都唔駛買
包括尿片墊同蕉蕉枕,奶咀,咁我咪咩都唔駛買囉
定等賣賣bb出世先買呢?

讓座

其實我對讓座既態度是
首先我一定唔會坐關愛座同優先座
因為我認為我唔符合以上所講既人士,尤其係我個肚暫時唔太大(到而家19weeks先叫大左少少)

之後有篇news講而家就算個肚幾大都唔會有好多人讓座,我既經驗係
我而家19weeks,係地鐵對住坐優先座既人(明明唔符合以上所講人士)佢地都唔會太讓座
幸好,我而家返呢份工係行路,唔駛搭車(如果唔係我相信我未返到公司都一肚氣)

其實佢地有無諗過,
如你or你太太第時大肚,你都想有人讓座比你or你太太
同埋你都有老既時候,到第時變左阿公阿婆,你都想有人讓座比你

而家d人只諗現在,都唔諗將來
如果你而家唔諗將來只諗自己既現在
咁你都唔好諗住到你第時有需要或會老既時候有人讓座比你

請將心比己.

賣賣bb 19 weeks+懷孕過程

賣賣BB已經19weeks la!
黎緊終於去QE見醫生,唔知有咩講呢

其實由有左BB到而家,我同書,網上講既懷孕生理變化都差唔多
開頭知道有左bb既一個月,我身體都仲ok食得瞓得
到左無幾耐之後就好大變化,好多野唔想食
如牛(太大朕味),雞(尤其係胸,好鞋),菜唔想食,奶唔想飲(因為滯住),魚唔想食(三文魚好少少),
搞到無咩想食,最慘係食左lunch最唔想係又要諗食咩dinner(因為無胃口無心機)

連煮飯都好耐無煮,我諗兩個多月都無煮過一餐兩送飯,最多有心情煮通粉
明明收工突然諗到最食咩,如triple o's 炸雞柳,買曬野返屋企.煮完唔想食
搞到老公都無啖好食,要買野or出街搞店
有時佢買左咖哩叮叮返屋企,朕味太難頂我唔比佢係我隔離食,要去餐檯食
有時買左野返屋企食,食左少少又唔想食
有時想食一樣食物,食完之後有排都唔想見到佢...

朝早例牌要嘔一嘔,係公司嘔過一次(其實我忍住),行行下街食完野作嘔
山長水遠返奶奶屋企,係車上會嘔
係屋企都好多時都想嘔

不過都無咩戒口
基本上我會食薯片(初時好想食)
食海鮮
飲凍野(凍檸茶,咖啡少d但都會飲)可樂
雪糕照食
食芒果(一次咁多,係泰國個時)
魚生(三文魚多,其他少食),生蠔(兩隻咁大把,老公生日個時)
辣野(戒唔到,由細到大都鐘意食)
有d話涼既就一定唔食,如西瓜,涼茶(羅漢果除外,不過都係飲左一次咁大把)

因為對我黎講,懷孕初期好多野都唔想食已經好辛苦,唯有食d想食既野
最好係老爺奶奶我媽都無問題.非常開通!
媽咪話有我個時日日一杯咖啡!

不過真係到我四個月之後身體好好多
無咩點嘔,有返胃口,好多野都食得(當然唔過份咁食)
精神好左好多,有心機煮返飯
返屋企同奶奶屋企都無問題

不過,有一樣野,我覺得我大肚之後脾氣差左
我諗我要控制一下,因為有排都未到生個時

賣賣bb 17weeks

上星期六我地去左仁安產前檢查
因為政府要到十月中先安排見醫生
而我地又有一個無見賣賣,所以就book左仁安睇
其實之前都睇左幾次

不過今次一入到去醫生同我講點解我仲黎搵佢
我唔岩???我唔知佢咩意思,老公同佢講因為要十月中先見政府醫生
所以想呢個時候睇下bb個status

入到去影左一陣
醫生都話一切正常
胎水,bb個頭,肚圍,腿骨size同我講既日子都吻合
不過醫生話bb係16weeks,但上次政府度頸皮話係17weeks
咁邊個岩,因為政府改早左我個預產期,我信邊個好?!
我忍唔住問醫生bb睇唔睇到係仔定女?
醫生都好仔細地睇,不過睇唔到
bb好乖張開雙腿,不過影像太朦睇唔到,要下次先lu
之後check埋小便血壓都正常
不過醫生呢個時候同我講,佢話佢唔會接生,所以bb過20weeks佢唔會再睇

當然我好想講,
醫生,你既意思係咪唔比再比$你賺?!因為你睇左我4次已經夠數?
其實由我第2次我已經知佢唔接生,但我係政府生,所以我唔需要搵私家醫生
但我估唔到係佢20weeks後唔再睇...

比佢咁講,我睇完之後即刻過對面book左另一個醫生下個月睇
好得意,仁安醫生唔係駐院,仁安駐院醫生係第二間醫務所掛牌,係咁咖?
我真係唔識..

奶奶你做咩剪我D相???!!!!

事先聲明,我今次只係寫我心情,完全無同奶奶嘈或者黑面

之前拖左好耐無心情又懶唔曬返d結婚相
因為比99問我地幾時去曬,又因為近排有返d精神

終於揀曬d相拎去曬,仲分好相
不過有d我唔識分就唔分(包括奶奶d朋友同一d我唔太熟識既親戚)

到比99既時候,99就拎出黎睇
點知佢睇睇下,將兩張我曬比佢細仔個女既solo相時話
做左曬佢大頭咁浪費,唔駛曬呢d啦
我話都曬左唔緊要啦,影得b女好得意嘛
點知99抽起,話唔比佢細仔仲要剪左b女個頭出黎即背景唔要)
當時我心諗,99你問都唔問就拎起,老實講我係曬比你細仔同新抱,如果佢地話唔要我唔介意你拎去剪or收藏,但係你問都唔問就拎起唔比佢地同剪b女個頭我覺得唔岩囉

當時我無出聲,諗住99講一次唔係真,點知佢講左幾次諗佢真係會拎走
我同老公講返我心諗既說話

不過要諗返,老爺99對我都好好
要老人家成日出黎同我地飲茶,
打比老公第一句就係問我點樣
有左bb想飲魚湯，返99屋企一定會煲比我飲

所以,為左兩張相
我應該唔好咁在意

發現賣賣

好想寫低有左BB的心情,
xanga我寫左好耐,唔知最後係咁無左,
因為改左,所以我無再去
我亦都無back up,因為我懶,又因為一切都成為回憶

結左婚之後無幾耐,就發現有左bb
我既親戚尤其係我舅父都問我無咪有左先結婚
因為我屋企之前親戚都係有左bb先結婚
我唔係囉
不過當知道之後,老爺奶奶當然好開心啦,我媽咪就唔想我太快有,
因為岩岩結左婚駛左一筆錢,佢又覺得我仲後生太早就生仔
不過,既然緣份已到,都無左負面既感覺,好好照顧bb

bb乳名會叫賣賣,
因為我地諗住叫燒賣