賣賣 39 weeks @ 政府+私家產檢

今日一次過兩邊都檢查
話咁快已經去到39週啦,兩個禮拜內就見到囡囡,其實心情都有點緊張,不停倒數緊(係成日諗住個隻)

今朝去左政府睇左先,
連落車老公都同我研究B座4樓點去(我估老公都開始緊張)
之後去到做左自助test就等睇助產士
助產士都無咩再講,因為已經講無可講,都係等bb出黎好過催生
因為我而家都已經39週,其實bb個頭仔係落左,不過無動靜
佢話如果下次再返黎睇佢(即係未生得),就要約41週返黎催生
佢話最好bb係催生之前出黎,因為催生而成功順產生到既比率一定比自然作動順產生到既比率低
我都有講其實有d變化,我都有d痛,個肚有時都硬硬地(比之前多),訓得勁差(我諗係我訓得太多同搵唔到個位訓),
不過既然bb未肯出黎就無計啦,明明上禮拜話未出黎都無事,今個禮拜已經要作最壞打算
bb,咁你乖乖地睇下幾時出黎啦

之後就去左私家度產檢
今日唔知咩事,等左好耐都無人,
我真是等左一個鐘先入到去(因為之前個個入左去好耐)
入到去醫生都無咩講,bb好健康,有7磅1安士(醫生話係大概呢個磅數)話好好
頭仔同肚肚都係38週,只係大脾骨已經over 40週, 其實醫生話佢話頭仔係骨盆附近都係正常,有d到生先會落去,胎水都開始減少不過都好多4.8, 一切好正常,不過醫生好樂觀話應該按進度出世(即係40週到)
仲話下次再見就係我生左之後幫我睇傷口埋口進度同谷奶情況,已經唔再睇啦(都好,原來葉醫生有得睇呢d,我都諗有無得生左之後睇下,始終兩邊睇下都好)

睇完之後,就要等左半個鐘先比錢
已經唔夠姑娘,我之前入去個個,仲係比錢既時候話仁安間房要轉, 埋單已經慢,仲比你搞一搞,我真係(佢仲要話d姑娘慢,唔係因為你多野搞,我都唔係成個鐘先入到房見醫生,而家埋單仲要等你比你搞一搞,都唔知邊個阻住曬)
今日睇政府10:30, 11:00唔駛已經走得(free)
私家約12:10我12:00去到,等左1粒鐘,睇左5-10分鐘,埋單半個鐘!($600)

豬兔對話

1. 老公返工

老公:老婆,我返工啦,我去搵錢啦
老婆:老公,對唔住(我仲係度訓,你已經要去搵食)
老公:唔係呀,老婆你仲叻,訓教都搵緊錢(產假$)
老婆:唔....咁我真係幾叻!

2. 診所
老婆:老公,好野,醫生話BB個頭仔終於落左去骨盆
老公:老婆,YEAH! BB個頭同你個骨盆"交接"!
老婆: 交接"成功"(普通話講)! 老公你覺唔覺得好似神8/9個個交接成功一樣呀?!
老公:無錯!

賣賣bb 37 weeks @政府產檢

20/2/2014 (thu)

已經進入每星期產檢既時候啦
今日老公陪唔到我產檢(37週既第一次)!
不過唔緊要啦,老公有野做真係陪唔到我,去左OUTWARD BOUND

因為師奶既關係去搭地鐵(老公本來話要打的)
無位坐都算,仲要連條柱d人都唔放過,明明有人捉住都唔理
本來都忍住,點知有兩個師奶傾傾下用個手袋hi到我個肚(我相信佢唔係有心,不過我個肚大咁一定係睇到個隻)
我講左句"唔該",咁佢就即刻知咩事,不過佢完住無出聲,下個站走埋

去左醫院,下晝真係無咁多人
自助檢查既時候見到個男人坐左係度飲緊青島啤,都估佢一陣會唔會發癲
點知真係,最後出動阿姐車佢老婆or女親人去睇急證,唉.....

等左45 mins先到我,
助產士話我一切正常,未生得,bb個頭1/5落左去
佢叫我茂多d,做多d運動可以快生d
茂?!個個都叫我唔好茂,我諗住都係做下家務茂下算
bb size正常,心跳正常,未出世住(其實只係37weeks)所以都無問題
最搞笑係佢問我今次係咪等得唔算耐,我答佢耐過上次,不過頭先個個阿媽搞左好耐
下次就係下禮拜四,不過下午full曬佢問我上午得唔得,我放緊假梗係無問題啦
佢即刻話8:30,我話唔駛咁早掛,就10:30啦

睇完去佳佳買埋糖水就返屋企lu

產假第三天

我好想問,究竟放產假既媽媽係咪好忙好多野做咖
點解我覺得自己好無聊既
老公奶奶唔想我周圍走,我係屋企一日到黑就係食,同睇電視/做家務
其實都真係幾悶下...

如果醫生講中我真係未來7日都未生得住,
咁我呢7日點過好呢

賣賣bb 37 weeks@ 私家檢查

今日約左睇私家醫生,因為我開始放產假唔駛揀禮拜六
話時話,我對我公司都算係咁
真係除左政府無得揀一定係平日睇,
我睇私家都係揀禮拜六,仲要我係返長短週,我老公返5日,但我都要揀短週先去睇
有次趕住就唔到,要收工即刻飛的出去睇私家都唔想請假
而且因為大肚一個月可能要放0.5-1日病假睇政府,我平時唔舒服都唔敢請病假,費事成日請假,仲會OT補返比佢彌補我內心既唔舒服(我個性格比較衰,唔鐘意爭人野)
因為畢竟我覺得自己做左幾個月大肚真係好唔好意思

講到咁遠,講返今日
今日約左葉醫生3點幾,一入到診所係超多人,
多人到老公都無位坐(唔緊要啦)

等左一陣到我,同醫生講返上次係QE做既b鏈test無事
我同醫生講我37週都未生得,醫生話其實20個媽媽先有1個係37週生
入到去照,bb個頭已經落左去骨盆啦
醫生話係好事,咁即係證明我盆骨夠位比bb落,好野!同埋bb跟進度落左去,可以準備生得
臍帶無纏頸,肚肚正常唔太大
我問醫生bb成日踢我左面係咩器官,原來佢bb既手手腳腳,好得意,醫生話一個個波波咁係手手腳腳
原來!原來!我個囡咁好腳法!醫生話佢腳仔比較長(似我老公,其實我老爺都好高)
醫生話bb生長得非常好,各方面都唔錯,按比例,心跳正常
不過bb而家開始係一個禮拜重100g,所以無咩點重,同埋用大脾骨黎check佢幾重,所以話我個囡其實唔太重
而且醫生話我個肚細左,即係bb落左去,叫我都係等幾時作動生得,不過醫生話我未來7日都未生得住

其實,我真心覺得葉醫生唔錯,正正常常,有笑容,無話因為我係政府生而有咩問題
所以,有媽媽唔知搵邊位私家醫生我都好建議佢

反蝗?!

睇新聞,上禮拜日有反蝗遊行
睇完之後,我有少少upset
upset係我有時都覺得大陸人好麻煩,無禮貌啦,唔衛生啦,講野好大聲啦,無文化啦,淨係識買名牌,唔識個d買奶粉日用品
但係,我覺得呢個遊行既香港人都有唔岩既地方

其實,香港有得遊行真係好民主
雖然要事先申請,亦都合情合理,唔理由無申請隨便遊行,就算唔影響遊客,都影響香港市民生活
講得太遠
我覺得呢次遊行香港人唔岩在,明明我地知識水平高d,成日都話自己有文化,但就係遊行時做d唔適當既行為,如豎中指,指住遊客黎鬧,講粗口
其實,既然你覺得你係文明既香港人,又點解要咁一般見識,同佢地係條街度指著對罵呢?!
咁樣你同佢地又有咩反別

最最最難頂係,遊行之後政府官員既反應
直斥香港市民既不是,不但係司長司長,連特首都直斥香港市民個日遊行
真係超級痛心,
雖然個日遊行香港市民有唔岩既地方,但係你唔係我地呢類平民
高官,你會搭地鐵咩?你話等多一班無問題,唔係一班係好幾班喎,我大住個肚都一樣,,咁你又會幾明我地呢?!
高官,你平日應該係去外國先買名牌,我地行尖沙咀旺角都難以喘氣,就算住到唔近中心點,住九龍灣都一樣咁多大陸人,你又明唔明我地想要既寧靜生活比人打破?!

其實,文化既差異真係好難改變
當人地要黎我地度,係咪佢要主動融入我地既文化先呢?
但係而家政府係叫我地融入佢地既文化,咁香港仲會進步嗎?

產假第一天

今日開始放產假了

我選擇左前3後7

其實有幾個原因,

1. 因為個肚越黎越大，坐係度做野屈住好辛苦
2. 最近工作真係比較忙,經常OT
3. 老公投訴叫我抖下(百分比比較細)

今日已經唔習慣
因為平日我起身返到公司打比老公叫佢起身返工
而家係老公起身同我講byebye

之後等到夠鐘落去食下午茶
再去買送,因為太得閒走去買料包水餃(即係要去街市)
回南天又濕,而且好耐無去d檔口唔同左,所以我諗諗下無咩必要唔去lu

返到屋企,chicco送bb車黎
我個囡有私家砵砵車啦,仲榮升車主,我同老公就做司機車佢周圍去

第一日已經唔慣,好彩幾日睇醫生,禮拜三約左同事lunch
下禮拜一無電,咁即係迫我返娘家啦

賣賣bb @ 36 weeks 政府檢查

11/2/2014 TUE

今日要去醫院覆診
因為上次姑娘check到話bb個頭仔係上面patpat係下面好擔心
要我今日返去睇下轉左未,如果未就要見醫生

今日約左10:30am
一去到,好多人囉....係多人到差d無位坐個隻
不過老公話好多人都係睇婦科唔係產科
最後多人到要坐係房既門口,
點知比個阿姐話要坐第二邊,我都想,不過無位嘛
最後搵到個位點知一分鐘都無就叫我啦...

入到去阿姑娘真似好趕,比人催佢唔知做咩
仲有另一個姑娘係度
今次無話我過重,肥係我度,仲要bb 重得好好,比例唔錯
最最最重要係佢話佢摸到bb個頭仔係下面,好野,唔駛見醫生
不過開始要一個禮拜覆診一次lu...
姑娘仲話過埋呢個禮拜就足月,要小心隨時生得
不過佢問我知唔知咩係傳統姿態生bb,上次運動班有講
不過佢話仲有幾隻可以揀,見到第二d,好似正常好多
有隻坐係度好似大便咁,係我最接受,不過到時點都唔知
生仔都有得揀,而家醫學真係進步左好多

今次到醫院排隊等，自己檢查磅重同見睇姑娘只係用左半個鐘
次次都係咁快就好啦

老公下禮拜陪唔到我睇醫生,即刻好擔心要我打的,我話打的都好危險..

賣賣bb 36 weeks @ 政府產前運動班2+私家檢查

今日真係好忙碌,首先係要去QE上產前運動班
今日教我地陣痛時呼吸方法,生產時呼吸方法同按摩技巧
其實陣痛時既呼吸方法都係教深呼吸及淺呼吸
而且由頭到腳既肌肉放鬆方法
生個時既呼吸方法

仲重要係老公幫你既按摩方法
我估唔多唔少都會幫輕下,起碼唔會叫你深呼吸
不過到時痛到咁,我都唔知會唔會"fet"開我老公叫佢唔好掂我

不過姑娘有叫我地唔好用咁多笑氣,聞得太多對產婦唔係咁好
姑娘仲叫我地做多d會陰肌肉運動,有個太太話每日做200次
嘩,我諗我都係放假先開始做

上完堂就去睇私家醫生啦
早左去既關係,姑娘都話要多一陣先到我(因為之前新年,所以醫生booking都好full)
不過唔緊要,診所係老公公司樓上,可以去老公公司坐下
大約點幾到我,醫生都應該好忙,見佢好多媽媽要睇
而家賣賣36weeks1day, 6.4 lbs,頭髮好長,個頭仔大左好多(比正常多1week,之前比正常少1week),肚仔比例正常,大脾骨似爸爸比正常長2weeks
不過今次賣賣個樣向入面睇唔到,唔比我地睇你有無扁咀呢囡囡?!

最後醫生都係同我地講賣賣size係中間線,不過我有問醫生佢頭仔仲未落有無問題
醫生就話而家36weeks未落都唔係好大問題,有時未必會咁準時,叫我地唔駛擔心
我唔擔心賣賣頭仔36weeks落未,我係擔心下禮拜睇政府比姑娘煩同恐嚇個下先驚,雖然我知佢地向最壞方向諗,不過連我地都未擔心仲要比佢嚇一嚇都好驚

賣賣bb,乖乖地下個week頭仔向下爸爸媽媽安心

賣賣bb 34 weeks @政府醫院檢查

30/1/2014 Thursday

今日又年三十,姑娘約左我去產前檢查
不過今日遲到,但過程好快
入到去姑娘話我個b係中碼bb,
其實我都唔係邊個講d野先係岩,醫生話唔係,姑娘話係
大致上bb心跳都好健康

今日要做b鏈test,好快完成
姑娘摸左我個肚好耐都唔知頭仔係邊
最後照左照聲波,之後佢好擔心
佢話bb個頭係上面,patpat係下面,擔心佢唔落黎
如果唔落得兩條路,一係做移位,一係開刀
不過我話而家都未到36weeks,不如等我36weeks睇埋私家醫生先再算
佢又okay喎!

最後叫我下次記得交老公夠唔夠產張form比佢

如是者,阿姑娘講完之後
我發覺我個囡移動得好勁,好大力,真係會覺得痛
尤其係佢"YOUNG"你個下,都真係幾厲害

不過,亦都越快到囡囡出世既日子
我地兩公婆都好緊張又期待又擔心

而且,胃酸倒流係我身上發生了
真係好辛苦...