賣賣BB出世了(下) @ 39 weeks 6 days

6/3/2014(THU)

落返產後房之後,正值探病時間
我阿爸媽咪老爺奶奶老公家姐姐夫都黎探我同bb
不過bb因為要係保溫箱一陣,所以無緣見大家住
大家都係度慰問我,因為我好精神(因為唔算太耐就生左bb)
之後老公買左飯比我食就夠鐘要走
呢一刻,最唔捨得係我老公(因為我要自己一個訓)

無耐姑娘就比返bb我,我個下...真係唔知點算點搞好
對住一個人仔,我個下好無助..
試比bb飲人奶,bb訓左根本唔想食,訓得好舒服
咁姑娘就拎走佢下一餐先比我餵,
點知到凌晨兩點幾,佢地推阿b比我,阿b都係唔想食,但又喊
個下我真係好想喊,因為佢唔肯食,又喊,我又驚嘈到隔離,最後叫姑娘推走佢

7/3/2014(fri)
大約7點幾姑娘比返bb我,但bb又係唔肯食訓左
之後有姑娘幫我睇傷口,佢話之前幫我聯針既姑娘手勢好好,而家傷口情況良好,子宮收縮又幾好,仲幫我睇上奶情況,不過我話bb唔肯食,佢地就教我手擠用針筒餵比bb
開始都唔錯,係幾痛,但起碼叫有初乳比bb食呀
中午老公黎左,買野比我食
我個刻好想返屋企,屋企最好,無壓力,起碼阿b有人同我分擔
我係醫院得自己一個好大壓力好無助

之後上左人奶班同沖涼班,人奶班當然有實戰機會,不過沖涼班就無啦,唯有返屋企試下啦

放晚屋企人黎探我終於可以見下bb同抱下佢,
兩個鐘既探病時間係最開心不過

之後阿b一直唔肯埋身啜,我擠奶亦都好痛無咩產量,我問姑娘有無問題
佢地答我阿b唔喊就無問題...佢喊wor,又叫我努力擠,有先得咖
最後我夜晚係醫院度喊左出黎...好辛苦...
最後有個姑娘幫我同bb補奶粉..
如是者我同老公呻..

8/3/2014(sat)
今日醫生巡房話我同bb今日可以出院
好野,終於可以離開,我好期盼住,因為出左院阿b喊我就唔驚嘈住人,無奶比佢食我都唔驚醫院唔肯比奶粉佢食
點知阿b一早好精神,肯啜奶奶,雖然唔知有無奶但好過唔啜
點知啜完無耐開始喊,我抱住佢,一路等夠鐘

直到1點幾時,阿b嘔奶
嚇到我禁鐘叫姑娘黎睇,阿姐話嘔奶好正常幫佢掃,我都講呢幾日我根本無咩奶比過佢食又點會嘔,除非尋晚姑娘幫我補奶個餐,之後佢驚驚地推左阿b出去
最後,話阿b血含氧低要上病房check
我即刻whatsapp我老公同佢講bb未出到院,
係等姑娘話我聽bb係病房係咩床位時我累到訓左,到3點幾醒,我老公已經係病房
最後我搞埋出院手續就上左病房睇阿b

上左病房,老公幫阿b第一次餵奶,病房好好多,唔會迫你餵人奶,可以餵奶粉
姑娘話阿b上到黎血含氧無咩事,但要再check未出到院
見到bb訓左係暖箱隻手拮左針口真係好心痛..bb,對唔住,係要留係醫院仲要咁辛苦,幸好bb無喊好乖乖咁食奶..(仲要食得好快,即係佢之後係產後房喊根本就係太肚餓!!!!!)

我同老公餵完佢奶到8點夠鐘就要走

最後我一個出院,聽日再探bb

賣賣BB出世了(上) @ 39 weeks 6 days

6/3/2014(thu)
我地個囡囡賣賣係今日下午五點幾出左世啦
囡囡都好錫媽咪,好快咁出左黎,令我痛楚無咁耐
等我仲記得就快d寫出黎先

我仲記得係3月4日時,我不停諗個囡點解咁耐都未出黎,唔通要催生?!所以我真係走去行樓梯or茂下,我行曬全層大廈(只係11層),來回兩次再係屋苑行
第二日,即3月5日見紅啦
仲好開心終於中左一樣,諗住就快生得,點知一直都無穿水同陣痛,我見QE張紙又無寫話見紅要有入院準備,咁我問朋友佢話唔痛就唔好去,唔係有陣痛都未生得又要留係醫院好悶,.咁我係度等等等,等幾時有陣痛啦,點知等到食埋晚飯訓埋教都無聲氣,仲好灰心,個晚又再行成層樓樓梯

終於係3月6日早上六點開始有陣痛,開始都唔知係咩野痛,即係個肚同個人下半身有D痛
原來,所謂既陣痛,係"痛到你條腰骨好似斷個隻"
我唔知有無人覺得唔係,不過我真係咁覺得,可以參考一下
之後都隔8-9分鐘先一痛,開始好似黎料時就叫醒老公,我老公仲半朦朧咁繼續訓教
真係堅,有D規律就叫老公起身買早餐,我就繼續痛住訓(因為訓得太多我尋日無訓過)
買完早餐,未食我就嘔返尋日個晚餐,SETTLE DOWN左,食左個包,好痛,打比我阿媽,話比佢知我陣痛就黎會入院
食完我就去左沖涼,一路沖一路痛(其實都仲忍到同接受到)
之後我竟然走左去訓,因為太累同埋我驚去到個姑娘會同我講"你根本未開喎,點解咁快入黎呀"...所以訓左一個鐘到11點我頂唔順,就同我老公講去醫院
大約12點前去到QE B4收症個度,我已經係痛個陣要企下,等痛完先行得,個姑娘問好多野,又要磅重,CHECK血壓等問問題,一CHECK已經話2度..仲話我好順利開得,一定今日生到

下午1點幾入左產前房C2,一開始要CHECK BB心跳30分鐘,之後叫我留小便,CHECK完無事,就同我講如果再痛D,有急便便既感覺就要叫佢CHECK下幾多度,
個個房,計埋我有4個人,一個應該係入黎照超聲波,一個應該係妊娠糖尿,一個見紅未痛,我....就係呢個房最"痛"之人...
到左3點到,我真係發覺開始痛到有急便便既感覺,就叫姑娘CHECK, 一CHECK,已經5度...即刻送返我去B4產房

個時只係3點幾,叫我老公通知屋企人,老公唔知點解比人阻止唔比入產房,得返我一個
入到產房,其實環境幾好,唔似手術室,似一間房+手術床(我諗咁樣會舒服D掛)
姑娘同我講,如果痛就聞笑氣,我真係痛個時聞,發覺,笑氣其實一D都止唔到痛
因為未穿水未再開得多度數,所以佢地叫我等穿水,後期我發覺越黎越痛,佢地終於比我老公入黎
其實,個下我真係痛到唔想理人,根本唔係"揸"住老公隻手,反而揸住張床既手柄仲好D
我老公既工作係拎住笑氣個罩,我一痛佢就比我吸
d姑娘搞搞下就走曬,因為仲有幾個媽媽係其他產房等生,叫我痛,穿左水就禁鐘,我叫老公禁左兩次,個資深少少既姑娘入黎就話,"生得啦咩,都未穿水"又話叫我忍住,因為想生時又未開曬個傷口未剪會爆,之後走左...
妖,忍到咩....之後我真係每次痛都夾住對腳痛唔比出黎,好辛苦,最後真係忍唔住,想痾時,叫老公再禁鐘,個時已經開到8度
個姑娘入黎又係想講"穿左水咩"既時候我講"我已經想痾出黎同feel到個頭仔想出黎,你好同我穿左佢(穿水)"
之後佢地真係幫我穿水,一穿水,真係勁痛,我開始一痛就叫(之前真係一路都忍住唔叫...呢一刻,我真係忍唔到)
過左無幾耐,佢地話唔再等,幫我生左先(因為我真係生得),個醫生入到黎,睇一睇,叫我痛就痾出黎,推手掣,唔好叫(好難.開頭有叫,叫左幾次比人鬧,就無再叫)
我個下,真係急便便,我同醫生講"我真係想痾屎...."
點知個醫生答我"你咪痾囉"
哦,,咁我痾啦....一PUSH,佢好似見到頭髮AND頭仔,好正常,順利,之後佢就交比姑娘走左
姑娘繼續叫我一痛就PUSH,開頭都唔想PUSH,因為已經無咩氣力,不過,到最後你一定會用力,因為,就黎成功
PUSH左幾次,佢地話見到頭髮,好多頭髮,我話"見到頭仔未"係未囉......
再PUSH佢地話"出到頭仔啦"....再PUSH多兩下,賣賣出左世啦!!!

我個下,真係...舒服曬...阿囡對我好好,唔算係痛左好耐,生都唔係用左好耐時間就生左
之後佢地拎走賣賣去清潔,就幫我按肚同拎走個胎盤(按肚係好冤冤痛)
CHECK左大致上完整,就幫我聯線(其實之前剪個下佢無同我講而家剪啦,反面講其他,剪個下,無咩感覺,不過剪左之後,我係知既,不過個時你已經痛到屎左完全會忽略佢)
佢話有少少痛,不過會打針,仲叫我如果痛聞笑氣,不過我無聞到...(呢D少少吉吉地比起頭先,已經唔算係咩)

之後就將賣賣送過黎比我啦,姑娘仲幫我地影相
老公開始打電話比屋企人
我就係6點幾送左去E2產後房

等運到

我到今日為止,仲係屋企等運到
因為,賣賣仲未肯出黎

今日已經係39weeks4days
唔知係咪bb係我個肚入面食好住好所以唔肯出黎呢
之前助產士同bb講而家暖返好快d出黎
可惜沒有

我阿媽話我同家姐都係遲左1個禮拜先出世(所以佢覺得無問題)
而我,都開始唔再諗咁多(因為呢個禮拜四再睇,佢已經會幫我約下禮拜催生,如果催生前未生,都係等個日,都係得返個幾禮拜啫)
開始周圍睇D媽媽要催生既BLOG,其實有好多都係催生前就生左,不過當然都有D係要催生先出世
有D人話催生仲快D,不過痛D(我諗我只會諗個囡快D出黎,都係痛十幾個鐘,忍左去,好過成日諗佢幾時出世)
同埋我覺得QE算唔錯,當初入助產士小組,去到後期個個禮拜都會返去,而我39WEEKS個時已經話下次再去睇就幫我約催生,服務唔錯,我睇有D媽媽話要去到42WEEKS先催生

尋日訓個時個肚好痛,不過完住唔係陣痛
係個肚吹左風個隻肚痛,痛痛下訓埋,訓醒無事,即係唔係個隻痛
唉....又食詐糊

唯有今日下午行左成層大廈既樓層(只是11層咁大把)同係屋苑平台行下路,行下樓梯
一間夜晚再行,唔知行完會唔會好D,不過一定自己個心舒服D

BB,希望你係催生個日之前出黎啦
爹地媽咪錫曬你~~